ከሀገር መከላከያ ሚኒስቴር በወቅታዊ ጉዳይ የተሰጠ መግለጫ፡፡

0
1480

አሸባሪው ህወሃት የጀመረውን ማጥቃት፣ በማያዳግም ሁኔታ እንቀለብሳለን!

አሸባሪው ህወሃት በሰሜን እዝ ሠራዊታችን ላይ ወረራ (ጭፍጨፋ) ከፈጸመ በኋላ መንግስት በወሰደው ህግን የማስከበር ዘመቻ የጠላት አከርካሪ ተሰብሮ ጁንታው ተደምስሶና የተረፈው ተበትኖ ዋሻ ገብቷል፡፡

መንግስት ለ8 ወር ትግራይን የማረጋጋትና የመልሶ ግንባታ ስራ እየሰራ ነበር፡፡ ትህነግ ግን ከተበተነበት እየተሰበሰበ በክልሉ ውስጥ ቀውስ የማባባስ ሥራ እየሰራ ጎን ለጎን ደግሞ መንግሥትን እና መከላከያን እየከሰሰ ቆይቷል፡፡

የሰብዓዊ ቀውስ እንዳይባባስ፣ ቀጣይ ዓመት የምግብ እጥረት እንዳይከሰት ለአርሶ አደሩ የእርሻ እድል ለመስጠት የተናጠል ተኩስ አቁም ውሳኔ በመወሰን ሠራዊታችን ከትግራይ እንዲወጣ ተደርጓል፡፡

በአጠቃላይ ለክልሉ የጥሞና ጊዜ በመስጠት ሕዝቡ የሚሻለውን አስቦ እንዲወስን እድል ለመክፈት ሲባል መንግሥት ተኩስ በማቆም ኀላፊነት የተሞላው ውሳኔ ወስኖ እንደነበር ይታወቃል ፡፡

አሸባሪው ህወሀት ግን ተመሳሳይ እርምጃ ከመውሰድ ይልቅ የመከላከያ ሠራዊታችንን ተከታትሎ በማጥቃት ግጭቱን ወደ አማራ እና አፋር ክልሎች በማስፋፋት በትግራይ እንዳይደርስ የተፈለገውን ቀውስ ወደ ሁለቱ ክልሎች አስፋፍቶታል፡፡

ግጭቱን ወደ አማራ እና አፋር ክልሎች በማስፋፋት የህዝብ መሰረተ-ልማቶችን እያፈረሰ ወስዷል፡፡ መውሰድ ያልቻለውን አውድሟል፡፡ ንጹሃን ዜጎችን ገድሏል፡፡ የአርሶ አደሩን እና የአርብቶ አደሩን ቤት አቃጥሏል፤ ከብቶቻቸውን የሚበላውን በልቶ ቀሪውን ገድሏል፤ እጸዋቶችን አጥፍቷል፤ አዝዕርቶችን አጭዶ ወስዷል፡፡

አሸባሪው ቡድን “የጅቡቲን መስመር ለመቁረጥና ወልቃይት ጠገዴን በማጥቃት በሱዳን በኩል ኮሪደር ለማስከፈት” የሚል ዓላማ ይዞ ተደጋጋሚ እና መጠነ ሰፊ ማጥቃት ፈጽሟል፡፡

“በሁለት ሳምንት አዲስ አበባ ለመግባት” በሚል በሰሜን ወሎ በኩል ሰፊ ማጥቃት ሲያከናውን ከርሟል፡፡ ጀግናው የመከላከያ ሠራዊታችን ይህንን ሀገር የማፍረስ የአሸባሪውን ቡድን እቅድ እንዲመክን አድርጓል፡፡ እጅግ ከባድ ኪሳራም አድርሶበታል፡፡

ከሦስት ቀን በፊት በራሳቸው አንደበት ሌ/ጀ ጻድቃን የተባለው የጁንታው አባል” …ጦርነቱን እናሳጥረዋለን፤ በሁለት ሳምንት አዲስ አበባ እንገባለን፤ ፖለቲካዊ፣ ወታደራዊና ዲፕሎማሲያዊ ሁኔታን እንቀይራለን …” በሚል ባወጀው ጦርነት በሁሉም ግንባሮች ውጊያ ከፍቶ ይገኛል፡፡ ራሳቸውም በለኮሱት ውጊያ በጀግናው የመከላከያ ሠራዊታችን እና ሌሎች የፀጥታ ኅይሎች ጥምረት እየተቀጠቀጠ ይገኛል፡፡

የአሸባሪው ቡድን መሪ ደብረጽዮን ገ/ሚካኤል ከሦስት ቀን በፊት የሌ/ጀ ጻድቃንን መግለጫ በማጠናከር “…ኢትዮጵያውያንን እንደ አባቶቻቸው በመቅበር ሰላማችንን እናረጋግጣለን…” የሚል ዕቅድ እንዳላቸው በሚዲያ ገልጸው እቅዳቸውን ተግባራዊ ለማድረግ በሁሉም ግንባሮች ከሰኞ ጀምሮ ውጊያ ከፍተዋል፡፡ በጀመሩት ውጊያ አይቀጡ ቅጣት እየደረሰባቸው ይገኛል፡፡

የመከላከያ ሠራዊታችን የአሸባሪውን ትህነግ ጥቃት የመመከት ውጊያ እያካሄደ የጠላትን ወራሪ ኀይል መመከት ብቻ ሳይሆን እየደመሰሰ የኢትዮጵያን ደኅንነት እና ህልውና የማስከበር ታሪካዊ ኀላፊነቱን እየተወጣ በጠላት ላይ ከባድ ኪሳራ እያደረሰና ሽንፈት እያከናነበው ይገኛል፡፡ ይህንንም ገድል አጠናክሮ ይቀጥላል፡፡

ኢትዮጵያ በልጆቿ መስዋእትነት ታፍራና ተከብራ ለዘለዓለም ትኖራለች!