አፍሪካውያን ለኢንደስትሪ ልማትና የእርስ በርስ ንግድ መጠናከር ትኩረት መስጠት እንደሚገባቸው አቶ ደመቀ መኮንን ገለጹ።

0
64
ባሕር ዳር፡ ሕዳር 14/2015 ዓ.ም (አሚኮ) የኢፌዲሪ ምክትል ጠቅላይ ሚኒስትር እና የውጭ ጉዳይ ሚኒስትር አቶ ደመቀ መኮንን በኒጀር ርዕሰ መዲና ኒያሚ በተጀመረው የአፍሪካ ህብረት ልዩ ስብሰባ ላይ ባሰሙት ንግግር፥ የአፍሪካ ሀገራት በመካከላቸው ያለው ንግድ እንዲስፋፋና የኢንዱስትሪ ልማቱ በተፋጠነ ሁኔታ እንዲቀጥል ማድረግ እንደሚጠበቅባቸው ጠቅሰው፤ ለዚህም የአመራሩ ሚና ከፍተኛ ነው ብለዋል።
ኢትዮጵያ የግል ባለሀብቶች የሚገጥሟቸውን መዋቅራዊ መሰናክሎች ለማስወገድና ለማበረታታት ሀገር በቀል የኢኮኖሚ ዕቅድ ተግባራዊ ማድረጓን አቶ ደመቀ አስረድተዋል።
ኢትዮጵያ የተሟላ አቅም ያላቸውና የአንድ መስኮት አገልግሎት የሚሰጡ 22 የኢንዱስትሪ ፓርኮች ግንባታ ማካሄዷንና የትምህርት ስርዓቱ ለኢንዱስትሪ ልማቱ ብቃት ያለው የሰው ኃይል መፍጠር በሚያስችል ሁኔታ መቀረፁንም አቶ ደመቀ መግለፃቸውን ከውጭ ጉዳይ ሚኒስቴር ያገኘነው መረጃ ያመለክታል።
የአፍሪካ ህብረት ልዩ ስብሰባ “የአፍሪካ የኢንዱስትሪ ልማት ለአካታችና ዘላቂ የኢንዱስትሪ ዕድገትና ኢኮኖሚያዊ ዘርፍ ማስፋት” በሚል ርዕስ በኒጀር መዲና ኒያሚ እየተካሄደ ሲሆን፤ ምክትል ጠቅላይ ሚኒስትርና የውጭ ጉዳይ ሚኒስትር አቶ ደመቀ መኮንን የኢትዮጵያን ልዑክ በመምራት ስብሰባውን ታድመዋል።
ለኅብረተሰብ ለውጥ እንተጋለን‼