በጎንደር ከተማ ከ24 ቢሊዮን ብር በላይ ካፒታል ላስመዘገቡ ባለሀብቶች የኢንቨስትመንት ፈቃድ መሰጠቱ ተገለጸ።

0
101

የካቲት 08/2014 ዓ.ም (አሚኮ) በጎንደር ከተማ ባለፉት ስድስት ወራት ከ24 ቢሊዮን ብር በላይ ካፒታል ላስመዘገቡ ባለሀብቶች የኢንቨስትመንት ፈቃድ መሰጠቱን የከተማ አስተዳዳሩ አስታወቀ፡፡

የጎንደር ከተማ አስተዳደር ምክር ቤት አራተኛ ዙር ዘጠነኛ ዓመት ኹለተኛ መደበኛ ጉባኤውን ዛሬ ማካሄድ ጀምሯል፡፡

የአስተዳደሩ ተቀዳሚ ምክትል ከንቲባ ዘውዱ ማለደ በጉባኤው ላይ ባቀረቡት የስድስት ወራት የሥራ አፈጻጸም ሪፖርት እንዳመለከቱት፤ የኢንቨስትመንት ፈቃዱ የተሰጠው ለ76 ባለሃብቶች ነው።

ባለሀብቶቹ በከተማው በአነስተኛና ከፍተኛ አምራች ኢንዱስትሪዎች፣ በሆቴልና ቱሪዝም፣ በግብርና ምርቶች ማቀናበር፣ በኮንስትራክሽንና ተዛማጅ የኢንቨስትመንት መስኮች ለመሰማራት ጥያቄ ያቀረቡ መኾናቸውን አስረድተዋል።

ባለሀብቶቹ ወደ ግንባታ ሲገቡ ከ20 ሺህ በላይ ወገኖች ቋሚና ጊዜያዊ የሥራ ዕድል እንደሚፈጥሩ ጠቁመዋል። ለባላሀብቶቹ የኢንቨስትመንት ቦታዎች መዘጋጀታቸውን ገልጸዋል።

አቶ ዘውዱ እንዳሉት፤ በግማሽ የበጀት ዓመቱ ከተማ አስተዳደሩ 4 ነጥብ 3 ቢሊዮን ብር ካፒታል ያላቸውን 28 ባለሀብቶች ለማስተናገድ አቅዶ ነበር።

ዘርፉን ለማሳደግ በተደረገ ጠንካራ እንቅስቃሴ ከ24 ቢሊዮን ብር በላይ ካፒታል ላስመዘገቡ ባለሀብቶች ፈቃድ በመስጠት ከዕቅድ በላይ ማከናወን መቻሉን አስታውቀዋል።

የከተማው ሰላም አስተማማኝ እየኾነ መምጣቱ እንዲሁም የጥምቅት በዓል በተለየ ድምቀት መከበሩ ለከተማው የኢንቨስትመንት እንቅስቃሴ መነቃቃት አስተዋጽኦ ማድረጉንም አቶ ዘውዱ ተናግረዋል።

ከተማ አስተዳደሩ ትልልቅ የኢንቨስትመንት ፕሮጀክቶችን ይዘው ለሚመጡ ባለሀብቶች የተለያዩ ማበረታቻዎች ማዘጋጀቱን የተናገሩት ደግሞ የአስተዳደሩ ኢንዱስትሪና ኢንቨስትመንት መምሪያ ኃላፊ አቶ ግርማይ ልጃለም ናቸው።

ባለሀብቱ ቢሮክራሲው ሳይረዝም የግንባታ ቦታ በፍጥነት የሚያገኝበትን የአሠራር ሥርዓት ከመዘርጋት ጀምሮ መሰረተ ልማት የተሟላላቸውን የኢንቨስትመንት ቦታዎች በቅድሚያ እንዲያገኝ እየተደረገ መሆኑን ገልጸዋል።

ከተማ አስተዳደሩ አልሚ ባለሀብቶችን ከማበረታታት ጎን ለጎን ለረጅም ዓመታት መሬት አጥረው ወደ ግንባታ ካልገቡ ባለሀብቶች 24 ሄክታር የግንባታ ቦታ በመንጠቅ በፍጥነት ለሚያለሙ ባለሀብቶች መሰጠቱንም ጠቁመዋል፡፡

የከተማው ምክር ቤት አፈጉባኤ አቶ ፀጋው አዘዘ፤ ምክር ቤቱ በቀሪ ስድስት ወራት ለከተማው ፀጥታ መጠናከርና ለመሰረተ ልማት መስፋፋት ትኩረት ሰጥቶ እንደሚሠራ መግለጻቸውን ኢዜአ ዘግቧል።

#ኢትዮጵያን እናልማ፣እንገንባ፣እንዘጋጅ ‼️
#ሀገርን በዘላቂነት እናልማ‼️
#የፈረሰውን አብልጠን እንገንባ‼️
#ለማንኛውም ፈተና እንዘጋጅ‼️

ተጨማሪ መረጃዎችን ከአሚኮ የተለያዩ የመረጃ መረቦች ቀጣዮቹን ሊንኮች በመጫን ማግኘት ትችላላችሁ፡፡
ዩቱዩብ https://bit.ly/2RnNHCq
በዌብሳይት amharaweb.com
በቴሌግራም https://bit.ly/2wdQpiZ
ትዊተር https://bit.ly/336LQaS
ቲክቶክ https://bit.ly/32rKF5J

በአሸባሪውና ወራሪው የትግራይ ቡድን በሰቆጣ፣ ቆቦ፣ ወልድያ፣ ላልይበላ፣ ደሴ እና ከሚሴ አካባቢዎች የወደሙና የተዘረፉ የሚዲያ መሳሪያዎችን መልሶ በመገንባት ለሕዝብ አገልግሎት ለመስጠት አሚኮን ይደግፉ።
https://ameco.bankofabyssinia.com/