በሰሜን ጎንደር ዞን በጦርነት ከወደሙት 207 ትምህርት ቤቶች ውስጥ ማስተማር የጀመሩት16ቱ ብቻ መኾናቸው ተገለጸ።

0
41
Made with LogoLicious Add Your Logo App
ደባርቅ፡ ሕዳር 09/2015 ዓ.ም (አሚኮ) በሰሜን ጎንደር ዞን በሚገኙ አምስት ወረዳዎች ውስጥ በጦርነት ከወደሙት 207 ትምህርት ቤቶች ውስጥ ማስተማር የጀመሩት 16 ትምህርት ቤቶች ብቻ መኾናቸው ተገልጿል። ወረራ በተፈጸመባቸው የዞኑ አምስት ወረዳዎች ውስጥ የሚገኙ ሁሉም ትምህርት ቤቶች ዘረፋ እና ውድመት ተፈጽሞባቸዋል።
አድርቃይ ወረዳ ወረራ ከተፈጸመባቸው ውስጥ አንዱ ነው። በአጠቃላይ 72 ትምህርት ቤቶች ነበሩት። የወረዳው ትምህርት ጽሕፈት ቤት ኀላፊ አረጉ ጆርጌ በወረዳው የሚገኙ ሁሉም ትምህርት ቤቶች መውደማቸውን ጠቅሰዋል። በወረዳው የሚገኙ 28 ሺህ 536 ተማሪዎች እና 1 ሺህ 300 መምህራን ለ16 ወራት ከትምህርት ቤት ውጭ ቆይተዋል ብለዋል።
ኀላፊው አዲርቃይ ወረዳ ከወረራ ነፃ ከወጣ ጀምሮ በወረራ ምክንያት የተበላሹትን ትምህርት ቤቶች ቅጥር ግቢ የማጽዳት ሥራ እየተከናወነ ይገኛል ብለዋል። ወረዳው ከወረራ ነጻ ከወጣ ጀምሮ እስካሁን 13 ትምህርት ቤቶች ብቻ በከፊል ትምህርት የጀመሩ ሲኾን ቀሪዎችን ለማስጀመር ግን ከወረዳው አቅም በላይ እንደኾነ አቶ አረጉ ተናግረዋል ።
በተለይም ሀገር አቀፍ ፈተና የሚወስዱትን የ12 ኛ ክፍል ተማሪዎች በቅድሚያ ወደ ትምህርት እንዲመለሱ ምዝገባ እየተካሄደ እንደሚገኝ ገልጸዋል። ከሌሎች የሀገሪቱ ተማሪዎች ጋር እኩል ውድድር የሚጠብቃቸው ቢኾንም ከ14 ወራት በላይ ከትምህርት ገበታ ውጭ መኾናቸው የአካባቢውን ተማሪዎች የስነ ልቦና ጫና ውስጥ እንዳስገባቸውም ገልጸዋል።
አቶ ሀረጉ እስካሁን ድረስ ለትምህርት ዘርፉ የተደረገ ተጨባጭ ለውጥ የሚያመጣ ድጋፍ እንደሌለም ገልጸዋል። በቀጣይ መንግሥት እና ረጅ ድርጅቶች የጉዳዩን አሳሳቢነት ተገንዝበው አስፈላጊውን ድጋፍ የሚያደርጉ ከኾነ ሁሉንም ተማሪዎች ወደ ትምህርት ቤት መመለስ እንደሚቻል አቶ ሀረጉ ገልጸዋል።
የሰሜን ጎንደር ዞን ትምህርት መምሪያ ምክትል ኀላፊ ወይዘሮ አጸደ በሬ፤ በዞኑ በጦርነት የወደሙ የትምህርት ቁሳቁሶች አለመተካታቸው ተማሪዎችን ወደ ትምህርት ለመመለስ እንቅፋት መኾኑን ተናግረዋል። የደረሰውን ውድመት በጥናት በመለየት ትምህርት ለመጀመር የሚያስችል ድጋፍ ለማግኘት በንቅናቄ እየተሠራ ስለመኾኑም ገልጸዋል።
Made with LogoLicious Add Your Logo App
ወይዘሮ አጸደ፤ ወረራ በተፈጸመባቸው አምስት ወረዳዎች ውስጥ የሚገኙ ትምህርት ቤቶች ሙሉ በሙሉ እንደወደሙ ገልጸዋል። ትምህርት ቤቶች ጥገና እና የቁሳቁስ ድጋፍ ተደርጎላቸው መደበኛ ትምህርት ለማስቀጠል በዞኑ ብቻ አቅም የማይቻል በመኾኑ የፌዴራል እና የክልሉ መንግሥት አፋጣኝ ድጋፍ ማድረግ እንዳለባቸውም ሀሳባቸውን ሰጥተዋል።
ከመንግሥት ድጋፍ ጎን ለጎንም ረጅ ድርጅቶች፣ ተቋማት እና ባለሃብቶች የተጎዱ ትምህርት ቤቶችን መልሶ በመገንባት ተማሪዎችን ወደ ትምህርት ገበታቸው ለመመለስ አጋርነታቸውን ማሳየት አለባቸው ሲሉም ምክትል ኅላፊዋ መልዕክት አስተላልፈዋል።
ዘጋቢ:- አሚናዳብ አራጋው
ለኅብረተሰብ ለውጥ እንተጋለን‼