“በምርጫው ኢትዮጵያን አሸናፊ ማድረግ ተችሏል” ብልጽግና ፓርቲ

0
53
“በምርጫው ኢትዮጵያን አሸናፊ ማድረግ ተችሏል” ብልጽግና ፓርቲ
ባሕር ዳር፡ ሰኔ 16/ 2013 ዓ.ም (አሚኮ) ኢትዮጵያ ሰላማዊና ዴሞክራሲያዊ ምርጫ በማካሄድ ማሸነፏን የብልጽግና ፓርቲ አስታወቀ።
የብልጽግና ፓርቲ ሥራ አስፈጻሚ ዛሬ አስቸኳይ ስብሰባ አካሂዷል።
የብልጽግና ፓርቲ ዋና ጽሕፈት ቤት ኃላፊና ሥራ አስፈጻሚ አባል አቶ ብናልፍ አንዷለም እንደተናገሩት ሥራ አስፈጻሚ ኮሚቴው በዛሬ ስብሰባው ፓርቲው በ6ኛው ሀገራዊ ምርጫ ያከናወናቸውን ተግባራት ገምግሟል።
ፓርቲው ወደ ምርጫው ሲገባ ሁለት ዋነኛ ዓላማዎችን ለማሳካት አቅዶ መንቀሳቀሱን ጠቅሰው፤ ቀዳሚ ዓላማው ያደረገው ሰላማዊና ዴሞክራሲያዊ ምርጫ በማካሄድ ኢትዮጵያን አሸናፊ ለማድረግ የበኩሉን ሚና መጫወት መሆኑን ገልጸዋል።
በምርጫው አሸናፊ ሆኖ ከሕዝብ የመንግሥት ኃላፊነት መቀበል ደግሞ ሌላኛው ዓላማ መሆኑን ተናግረዋል።
ሥራ አስፈጻሚው በዛሬው የፓርቲው ስብሰባ በዋናነት በምርጫው ኢትዮጵያን አሸናፊ ማድረግ የሚለውን የፓርቲውን ቀዳሚ ዓላማ ለማሳካት የተከናወኑ ተግባራትን ገምግሟል ብለዋል።
ሰላማዊና ዴሞክራሲያዊ ምርጫ በማካሄድ በምርጫው ኢትዮጵያን አሸናፊ ማድረግ እንደተቻለ መገምገሙን ተናግረዋል።
ሥራ አስፈጻሚ ኮሚቴው “በምርጫው አሸናፊ ሆኖ ከሕዝብ የመንግሥት ኃላፊነት መቀበል” የሚለውን የፓርቲውን ሁለተኛ አንኳር ዓላማ ብሔራዊ የምርጫ ቦርድ የምርጫውን ውጤት ይፋ ካደረገ በኋላ እንደሚገመግመው ገልጸዋል።
ምርጫው ሰላማዊና ዴሞክራሲያዊ እንዲሆን ደግሞ ኢትዮጵያውያን አይተኬ ሚና መጫወታቸውን ነው ያነሱት።
በዚህም የፓርቲው ሥራ አስፈጻሚ ኮሚቴ ለመላው ኢትዮጵያውያን ምስጋና አቅርቧል ብለዋል።
ያለ ተፎካካሪ ፓርቲዎች ትብብር ምርጫውን ሰላማዊ በሆነ መንገድ ማከናወን አይቻልም ነበር ያሉት ኃላፊው፤ በመሆኑም ሥራ አስፈጻሚ ኮሚቴው በምርጫው የተሳተፉ ፓርቲዋች ለሂደቱ ሰላማዊነት ላደረጉት አስተዋጽኦ ምስጋና ማቅረቡን አስታውቀዋል።
ምርጫ ቦርድ በአጭር ጊዜ ውስጥ ተቋማዊ አደረጃጀቱን አስተካክሎ ምርጫውን ለማከናወን የሄደበትን ርቀትም አድንቀዋል።
የመገናኛ ብዙኀን የምርጫውን ሂደት ለሕዝብ ተደራሽ በማድረግ ረገድ ጉልህ ሥራ እንዳከናውኑም ሥራ አስፈጻሚው መገምገሙን ያወሱት አቶ ብናልፍ፤ ለዚህም አድናቆቱን መግለጹን ተናግረዋል።
በቀጣይ በሌሎች አከባቢዎች የሚካሄደውን ምርጫ ሰላማዊና ዴሞክራሲያዊ እንዲሆን ሁሉም ባለድርሻ አከላት በተለመደው መልኩ ኃላፊነታቸውን እንዲወጡም ጥሪ አቅርበዋል።
ዘገባው የኢዜአ ነው
ተጨማሪ መረጃዎችን ከአሚኮ የተለያዩ የመረጃ መረቦች ቀጣዮቹን ሊንኮች በመጫን ማግኘት ትችላላችሁ፡፡
በዌብሳይት amharaweb.com
በቴሌግራም https://bit.ly/2wdQpiZ

LEAVE A REPLY

Please enter your comment!
Please enter your name here