ለኢትዮጵያ እቆማለሁ ድምፄን አሰማለሁ” በሚል ነገ በመስቀል አደባባይ የሚካሄደው የድጋፍ ሰልፍ በሰላም እንዲጠናቀቅ አስፈላጊውን ቅድመ ዝግጅት አጠናቅቆ ወደ ሥራ መግባቱን የፀጥታና ደኅንነት የጋራ ግብረ ኃይል አስታወቀ።

0
90

አዲስ አበባ: ጥቅምት 11/2015 ዓ.ም (አሚኮ) ነገ በመስቀል አደባባይ የሚካሄደው የድጋፍ ሰልፍ በሰላም እንዲጠናቀቅ አስፈላጊውን ቅድመ ዝግጅት አጠናቅቆ ወደ ሥራ መግባቱን የፀጥታና ደኅንነት የጋራ ግብረኃይል አስታወቀ።

የድጋፍ ሰልፉ ተጀምሮ እስከሚጠናቀቅ የተወሰኑ መንገዶች ለተሽከርካሪ ዝግ እንደሚሆኑም የአዲስ አበባ ፖሊስ ገልጿል።

“ለኢትዮጵያ እቆማለሁ ድምፄን አሰማለሁ” በሚል መሪ መልዕክት በሀገር አቀፍ ደረጃ በተለያዩ ከተሞች ጥቅምት 12 እና 13 የድጋፍ ሰልፍ እንደሚካሄድ ይታወቃል። ሕዝባዊ ሰልፉ መንግሥት የኢትዮጵያን ግዛታዊ አንድነት ለማስከበር የሚያደርገውን የመከላከል እርምጃ የሚደግፍ እና የውጭ ጣልቃ ገብነትን የሚያወግዝ ሲሆን ይኸው የድጋፍ ሰልፍ በአዲስ አበባ መስቀል አደባባይ ቅዳሜ እንደሚካሄድ የፀጥታና ደኅንነት የጋራ ግብረ ኃይል አስታውቋል።

መርሐግብሩ በሰላም ተጀምሮ እንዲጠናቀቅ ለማስቻል አስፈላጊውን ቅድመ ዝግጅት አጠናቆ ወደ ሥራ መግባቱንም የጋራ ግብረ ኃይሉ ገልጿል።

በመስቀል አደባባይ የሚካሄደው የድጋፍ ሰልፍ ተጀምሮ እስከሚጠናቀቅ ድረስ የትራፊክ መጨናነቅ እንዳይፈጠር የተወሰኑ መንገዶች ለተሽከርካሪ ዝግ እንደሚሆኑ የአዲስ አበባ ፖሊስ አስታውቋል። በዚህም መሠረት:-

• ከመገናኛ ወደ መስቀል አደባባይ እንዲሁም ከኤድናሞል በአትላስ ወደ ካዛንቺስ የሚወስደው መንገድ ኡራኤል አደባባይ ላይ

• ከጎተራ ወደ መስቀል አደባባይ የሚወስደው መንገድ አራተኛ ክፍለጦር

• ከጎፋ በአዲሱ መንገድ ወደ ለገሀር ለሚመጡ ቂርቆስ ቤተ ክርስቲያን መስቀለኛ ላይ

• ከቡልጋሪያ በሜክሲኮ አደባባይ ወደ ለገሀር የሚሄዱ ለገሀር

• ከሳር ቤት ወደ ሜክሲኮ አደባባይ እንዲሁም ከጦር ኃይሎች በልደታ ከፍተኛ ፍርድ ቤት ወደ ለገሀር የሚወስደው ሜክሲኮ አደባባይ

• ከተክለ ሃይማኖት በጎማ ቁጠባ ወደ ለገሀር ሰንጋተራ 40/60 ኮንደሚንየም አካባቢ

• ከጌጃ ሰፈር፣ በአምስተኛ ፖሊስ ጣቢያ የሚሄዱ አሽከርካሪዎች ጎማ ቁጠባ አካባቢ

• ከመርካቶ በተክለ ሃይማኖት ጥቁር አንበሳ ሆስፒታል ሜትሮሎጂ በር ላይ

• ከራስ ቴአትር በጎላ ሚካኤል ውስጥ ለውስጥ ጎላ ሚካኤል መስቀለኛ መንገድ ላይ

• ከተክለ ሃይማኖት ጥቁር አንበሳ ኢሚግሬሽን ጥቁር አንበሳ ሼል አጠገብ

• ከፒያሳ በቸርችል ጎዳና ለገሀር ቴዎድሮስ አደባባይ

• በአሮጌው ቄራ ፍል ውኃ ንግድ ማተሚያ ቤት አካባቢ

• ከካዛቺስ ወደ ሂልተን ካዛንቺስ ቶታል አካባቢ

• ከአዋሬ በካዛንቺስ ወደ ፍል ውኃ የሚወስደው መንገድ ፍል ውኃ አካባቢ ከለሊቱ 11 ሰዓት ጀምሮ ለተሽከርካሪዎች ዝግ እንሚደረግ አሽከርካሪዎች አውቀው አማራጭ መንገዶችን እንዲጠቀሙ እና በተገለፁት መንገዶች ላይ ለአጭርም ሆነ ለረጅም ሰዓት ተሽከርካሪ አቁሞ መሄድ እንዲሁም ከአርብ ምሽት ጀምሮ ተሽከርካሪ ማሳደር ፍፁም ክልክል መሆኑን የአዲስ አበባ ፖሊስ ገልጿል፡፡

ኅብረተሰቡ የፖሊስን አገልግሎት ለማግኘትም ሆነ አጠራጣሪ ነገሮች ሲያጋጥሙት መረጃ ለመስጠት 991 ወይም 816 ነፃ የስልክ መስመሮችን እና 01- 11 -11- 01 -11፣ 01- 11- 26- 43- 59 እንዲሁም በ01- 11- 01- 02- 97፣ መጠቀም የሚችል መሆኑ ተገልጿል፡፡

ለሀገር ክብር በትግል እናብር‼